لە کاتێکدا مشتومڕەکان سەبارەت بە پێشێلکردنی مافی زیندانییانی ناو گرتووخانەکانی تورکیا بەردەوامە، بانگەشەی ئەوە دەکرێت کە ژمارەیەکی زۆر گرتووخانەی نهێنی لە ناوچەکانی ژێر دەسەڵاتی حکومەتی تورکیا لە باکوری سوریا بوونیان هەیە و خەڵکێکی زۆر بێ ئەوەی هیچ تۆمەتێکی فەرمی لە دژیان هەبێت تێیدا بەندکراون و تەنانەت ئەشکەنجەش دەدرێن.
بە گوێرەی هەواڵێکی “Jarusalem Post”، بە پشت بەستن بە وتەی ئەو کەسانەی لەو زیندانانەدا بەندکراون و دواتر ئازاد کراون، هەبوونی چەندین گرتووخانەی نهێنی لە ناوچەکانی ژێر دەسەڵاتی تورکیا پشتڕاست کراوەتەوە. وە هەروەها لە هەواڵەکەدا باس لەوە کراوە کە تەواوی زانیارییەکان و ئەو وێنانەی لەبەردەستدابوون لە لایەن تیمێکی تایبەتی ئەمریکاوە لێکۆڵینەوەیان لێکراوە و پشتڕاست کراونەتەوە.
نادیە حەسەن سولەیمان کە بۆ ماوەیەک لە یەکێک لەو زیندانانەدا ماوەتەوە باس لەوە دەکات کە دوای ٢ مانگ لە دیارنەمانی هاوسەرەکەی لە مانگی حوزەیرانی ٢٠١٨ دا خۆشی براوە بۆ لای هاوسەرەکەی کە لە زیندانێکی شاری عەفرین بەندکرابوو، وە بە توندی ئەشکەنجەدراون و دوای ئەوەی بۆ ماوەی ٢ ساڵ لەو زیندانەدا ماونەتەوە ئازاد کراون و دواتر لە ڕێگەی قاچاخچییەوە جارێکی تر توانیویانە لە سوریا هەڵبێن.
نادیە ئاماژەی بۆ ئەوە کرد کە ژمارەیەکی زۆر گرتووخانەی نهێنی تورکیا لەو ناوچانەدا هەن کە ژمارەیان نازاندرێت و تەنها لەو زیندانەی ئەوی تێدا بەندکرابوو ١١ ژنی دیکەی لەگەڵدا بووە و دەڵێت: “پێم وایە ئەو زیندانە نهێنییانە لە لایەن دەزگاری هەواڵگری سەربازی تورکیاوە بەڕێوە دەبرێن و چەندین جار لە لایەن ئەفسەری تورکەوە لێپرسینەوەمان لەگەڵ کراوە. من بە تۆمەتی هاوکاری کردنی ڕژێمی ئەسەد و پەکەکە لەو زیندانەدا بەندکرابووم. بە شێوەیەکی سیستەماتیکی هەموو ڕۆژێک ئەشکەنجە دەدرام و دەیان جار دەستدرێژی کراوەتە سەرم. هەموو زیندانییەکانی دیکەش بە شێوەیەکی زۆر خراپ مامەڵەیان لەگەڵ دەکرا”.
