ئەو چەترە زەردەی ڕێگەیان نەدا بچێتە ئاهەنگی نەورۆزە چووە ناو پەرلەمانی تورکیاوە
عومەر فاروق گێرگێرلیئۆغڵو پەرلەمانتاری پارتی دیموکراتی گەلان (هەدەپە)، ڕەخنەی گرت لە قەدەغەکردنی ڕەنگی زەرد و سوور و سەوز لە ئاهەنگەکانی نەورۆز لە گەبزە و ڕەخنەی گرت لە دانانی ئەو ڕەنگانە بە “مەترسیدار” و وەک ئیدانەیەک لەسەر سەکۆی پەرلەمانی تورکیا چەترێکی زەردی هەڵکرد.
گێرگێرلیئۆغڵو وتی، “باوەڕ بە گوێیەکانت ناکەیت، وا نا؟ پاڵتۆی سوور، سەرپۆشی زەرد، بلوزی سەوز بە مەترسیدار دادەنران و ڕێگەیان پێنەدرا بچنە ناو ئاهەنگەکانەوە”. گێرگێرلیئۆغڵو چەند وێنەیەکی نیشاندا کە لە گردبوونەوەکەدا گیراون.
گێرگێرلیئۆغڵو لەدرێژەی قسەکانیدا باسی لەوە کرد کە تەنانەت چەترێکی زەردیش لە ئاهەنگەکەدا ڕێگەیپێنەدراوە ببرێتە ژوورەوە و بەڵام ئەو هێناویەتی بۆ ناو پەرلەمان. هەروەها باسی لەوەش کرد کە ژنێک بە سەرپۆشی زەردەوە کە منداڵێکی ساوا لە باوەشیدا بووە، ڕێگەی نەدراوە بچێتە ناو ئاهەنگی نەورۆزەوە.
